27th August, 2024: Vawiin khan Mizoram sorkara Sericulture Department leh Research Extension Centre, Central Silk Board, Aizawl tangkawp buatsaihin ni thum awh tur 'Silk Dyeing Training' hawnna inkhawm neih a ni a. He training hawnna hi Sericulture Training Institute, Zemabawk-ah neih a ni.

Silk Dyeing training hawnna inkhawm Pu B. Lalchhuana, Deputy Director (Technical), Sericulture Department kaihhruaiah training hawngtu Lalbiakthanga, Jt. Director & Principal STI chuan Sericulture pawimawhna leh entrepreneur-te ram hmasawn nana an ṭangkai dan te a sawi a. Khawvel puma Silk mamawhna a san zel avang leh ram tam takah Silk an siam chhuah ve theihloh avangin Mizoram leilung hausa leh boruak nuam tak Silk pangngang khawina atana duhthusamah Silk tharchhuak uar ang u a ti. Silk tharchhuah hi Mizoram leilung hausakna haichhuahna pawimawh a ni a; thingtlangmite ei leh bar zawnna kawnga an dinhmun chawikang theitu tur leh ram economy dinhmun sang taka hlangkai theitu a ni thei a ti. Silk Dyeing chungchangah hetianga a hmasa ber atana Training buatsaih a ni thei hi a lawmawm a, mi bik leh thiamna bik mamawhna khawvelah hian entrepreneur tha tak ni thei turin trainee-te thiamna hlu tak pawchhuak ngei turin  a chah.  

He hunah hian Training Co-ordinator Pi F. Lalbiaknungi, Sericulture Inspector chuan Training chungchang thil pawimawh sawiin Pu B. Lalchhuana, Deputy Director-in lawmthu sawina neiin Training hawnna inkhawm hi a khar a ni. Silk Dyeing Training-ah hian District 9 atangin mi 21 an lo tel a ni.